Ja, ludkowie rostojmili, niy ma co ciepać afy, bo to je ale richtik tymat terozki gorki, kaj mie sie polityk we śnie ukozoł, mie na ryncach targoł i kusiki dowoł, a potyn my sie wykopyrtli we krzoki i łod tygo wszyjstkigo, żech z betów na zol rypła i zrobiłach sie ała we gorść.
Bez to wszyjstko łaża terozki posiniaczono jakbych była apluzynom co jom bajtle dostoli jako geszynk pod krisbaum i potyn chcieli łobdziyrać ze skóry i zeżerać, ale jako, że apluzyna je kulisto to sie jeji ucufaliło pitnońć pode szrank, abo inkszy bifyj.
Zarozki żech zmiarkowała, że takie sny łobscyniczne to jo mom bez to, że za wiela je zbereźnioków, perwersyjoków i polityków we tym pierońskim internecie, a jo sie sam za wiela na Salon24 ślypióła i bez to potyn mie sie we nocy wszyjstko pofandzoliło a wyłonaczyło i ta notka jo pisza za przyjstroga, bo mie sie śniół niyjaki Krzysztof Bosak i to boło srogo gryfnie, ale komu sie tam może jeszcze jaki inkszy polityk przyśnić, a kiery je najrzodniyjszy to sam niy musza godać. Wiela we tyj polityce je rzadnych, a do tygo dupcom fleki a majom srogie ipi i jo sie tak myśla, ludkowie, że kożdy tam mo takigo, co jak by sie przyśniół we sytuacyji intymnyj to byście tak przyd nim pitali, że byście bez łokno jak hazok skokali.
O politykach jo sam niy byda pisać, bo na polityce sie niy znom, ale za to wom napisza o zbereźniokach a perwersyjokach ze Salona, byście sie dali pozór na tych bandurków i chaberniców.
O babie żech już pisała, chopów na pokuszynie wodzoncom co sam pisała "Cipka jest zawsze czynna", bez to dzisiok jom łostowia i sie zabiera za jednygo chopa, co we perwersyji swyj jom we zadku zostowiół i niy pisze ino o tym co bober je gotowy, ale o swoji auslynderskij skórce we szlafcimrze:
"(. . . ) przytulny kącik w sypialni, nasze skóry (. . . ) są idealnym wyborem. Ich luksusowa konsystencja zachęca do zanurzenia stóp w ich miękkości (. . . ). (. . . ) to nie tylko uczta dla zmysłów, ale także stylowy akcent. Położone na krześle, umieszczone w nogach łóżka lub używane jako dekadencki dywan, nasze skóry owcze natychmiast podniosą atmosferę w dowolnym miejscu. Poczuj niezrównaną radość zanurzenia się w miękkim uścisku (. . . ) skóry owczej natury (. . . )"
To je ale perwersyjo! Kto to widzioł bobra czy inkszygo baróna chalać girami, a po niym łazić, abo ze skóry łobdzirać jak jako apluzyna? To je zeźwiyrzyncynie a zbereźiyństwo, bo sie moga wyobrazić, że sie jaki istny jeszcze siednie na ta skórka ze gołom rziciom, a bydzie sie na tyj skórce ze źwiyrzoka umrzika łonaczyć ze jakimś politykiym, abo inkszym zazrokiym.
Do tygo mie tyn mamlos pieroński zablokowoł, ale to i tak mom we rzici, bo widziałach, że sie Gospodorz Kobuch tyż na tyj perwersyjnyj afie poznoł i wciepnoł go do pywnicy, bo jak to u nos godajom: "Der di das kokot kury pas. Pas je cołki lato, dostoł szmary za to. "
I tela. :-)))
