Takie momy czasy, ludkowie rostojmili, że kaj sie niy wejrzysz to Proroków, a Jasnowidzów uwidzisz, a kożdy regiyrować mo chyńć we internecie, przełonaczo śliypiami, ciepie afy, a majto rynkami jakoby mioł jako epilepsyjo, abo inkszo niymoc, a łod tygo onych fandzolenio to ale richtik ino hercklekoty a hicwele i kopfszelónty niekiere dostowajom.
Spozierajom te rostomajte bamóntne miglance i boroki na tych Proroków ze interneta, a potyn sie bierom, kiejby ich drapszajs chycił, za blogowanie i prorokowanie na Salon24, bo majom srogi fiber i sie im zdowo, że som Hergott bez niych godo, bez to kaj lajerman durś ino to samo fandzolom, a blindujom ludziów po cołkij blogierzajcie, bo taki majom druk kaj sztómple na grubie.
Kaj zaś taki Misyjónorz Bożyduda Gandalf ponbóczkowo procesyjo na Salon24 wykludzi to sie biere wandertasza i wandruje świot drógi, a zowdy uwidzi żłobina na krajcoku, bele kaj rzadno sztela, abo wyglajzowany wegwajzer czy inkszy landszaft ze hasiokiym.
Łod tygo wszyjstkigo mu sie we gowie pofandzoli i potyn je piźniynty po cołkiymu, bez to sie biere za niywłaściwo polityka* i sie ciśnie na kozatelnica, egzorta łodprowiać, aż go farorz ze żegnoczkyim kaj jancykrysta jakiygo musi ze fary wyciepać.
Ze takich to wyciepanych ze fary sie bierom potyn gupieloki co majom ipi, aże zgrzypi, a Beboki im pod deklym siedzom i taki piźniynty pragliwy machlyrz sie to myśli, że ón je wybrańcym narodu, a jak jeszcze terozki niy je, to po wyborach na zicher bydzie, bez to ciepie afy, a dupcy fleki wysztiglowany kaj puter na placu, a ślypia mu lotajom kaj kopruchy kole półrzitków.
Dejcie sie pozór ludkowie na takiych zeżyrnych szauszpilerów, co dowajom na lepsze, bo to som utrzijdupskie szpotloki, a zmazane warpiorze świdrate, co zachropociole godajom szpicatom godkom, bo kaj bez welunek do amtu niy wlizom to sie na zicher zejscajom, a zdżistajom do galot.
Na welunek recht je iść, niy zasmolić tygo!
A welować na takiygo, co wom godo, że bez roboty maszketów niy ma, spoziero wom prosto we ślipia, rynce mu niy lotajom, kożdygo mo we zocy, a za Ponbóczka sie niy przeblyko.
*) We ślonskij godce:
Polityka - narzędzie na kiju do gaszenia świec w kościele.
/Źródło: Joanna Furgalińska, "Ślonsko Godka - ilustrowany słownik dla Hanysów i Goroli"/
Ps. A pamiyntejcie tyż o tym, co to je Cisza Wyborczo! :-)