Ja, ludkowie rostojmili, jak by to pedziała japońsko wróżka ślonskiygo pochodzenio: Jo To Czułach.
Kaj sie niy łobrócisz to mosz z zadku rzić, a za tom rziciom sie furgajom tajne agynty jak jakie luftmysze.
Jo żech je tako richtik gryfno i zdolno do pisanio frela, to mie sam niy dziywuje to, że kożdy by chcioł być taki jak jo.
Niekiere poszli zaś o konsek dalij i napisali, że łone som mnom i tak żech została bez cufal chopym i to niy ino jednym, ale trzoma, abo je ich wiela wiyncyj, ale mie tygo niy pedzieli.
Bez tych bezkurcyjów breweryjoków szpasowników mo terozki tako Frau Edith ino zgorszynie, je nerwowo jak pieron i bez to przi komyntowaniu zapomino polsko godka i jak karlusy to czytajom to ciepiom afy i majom wiela szpasu.
I to, ludkowie by było do strzimanio do mie, co sie inne podowajom zo mie, ale to co żech dzisiok dostała na Galaktyczny Telefon mie wyglondo na jakigoś pierońskiego agynta co sie chce na krziwy pysk do mie na geburstag przylyź i jo Wom godom: takiygo ciulskigo łobrzympoła z ryjokiem jak afa to zaklupia żelozowym szperhokiym. I tela.
