Ja, ludkowie, przyjszoł czos o babsko-chopskich sprawach co napisać, bo to je ale modny terozki temat, a jo widza wiela wiyncyj jak te klugszajsery co im sie zdowo, że to je takie ajnfachowe ze babami i chopami a tym tam Mars i Wenus.
Zarozki Wom godom, że z babom rady niy ma, bo baby zowdy byli zeżyrne, a pragliwe i sie bez to schachorzyły, a chopy to zowdy byli ciulskie mamlosy, co ino ciulikiem myśleli i z tygo sie wzieny dramaty we ludzkości.
No tyn przykłod, żech czytała w jednym cajtungu o takij istnyj co była srodze gryfno, łóna tych chopów na pokuszynie wiedła i tak dugo półrzitkami krynciła, a ślipiami świyciła spode rzynsów, aż taki ciulik mamlos, co mioł wiela geldu, sie z niom łożynił.
Jak już sie jego wziena we łobroty to mu uwarziła żuru ze kartoflami, wciepła tam do tygo jaki korzyń i wloła trocha zajzajeru, a jak łon to zeżar to na drugi dziyń był gotów. Kaj zaś dochtór przyjszoł łobejrzyć umrzika to dochtorowi łóna pedziała, że jeji chopa trefił mór, dochtór sie w galoty zdżistoł, bo mór to je mór, pitnoł fort i tela.
Potyn sie tyn babski chachor wzion za inkszygo milionera i zarozki po żyniaczce tyż był gibki pogrzyb, aż sie policmajstry skapowali, co tych zdechloków przy nij cosik za wiela było i ta pierońsko motyka chycili, zawarli do harestu, a godali na niom Czorno Wdowa.
Ja, chopy, takie som te filozofije, że jak chopym ciulik regiyruje to babom regiyruje pełno kabza i na to sie nic niy poradzi, ale jak mosz tam chopie jaki geld srogi, abo sie żeś zrobiół srogo Ergo Asekuracyjo, to dej sie pozór na tako baba, co ci tak trocha za wiela przaje i pierońsko ino wzdycho. Jo to moim Trzycim Śliypym widza co sie takij babie pode deklym wyłonaczyło, kaj na ciebie blik ciepła, a takie fandzolynie jak łona sam robi to ino je teater do chopów mamlosów, bo zarozki sie wygodała jak ino zaczła śpiywać, co jom tak we tym chopie richtik rozhajcowało:
