Ja, ludkowie rostojmili, przyszoł zaś czos karnawałowy i kożdy musi sie sam za inkszego przeblykać i to je gryfnie, ale tyż sie pozór doć musicie na wiela rzecy i jo wom sam gibko wykludza o co sie rozchodzi.
Baby muszom doć sie nojsompiyrw pozór na chopów, bo chopy to som gizdy i taki sprostok jaki, sie we karnawał przeblyce we wysztiglowanygo jak puter na placu byamtra, a bydzie sam babie rajcowoł i jom robił za błozna, ino po to by jom kaj we ajnfarcie wyłonaczyć.
We Niymcach baby som maszketniki, bez to kaj sie niy łobrócisz to jako Berta Presswurst uwidzisz i bez to nosze ślonskie Kreple sie sam tukej we Niymcach nazywajom Berliner. To je dyć bez to, aby baby dowały u piekorza pozór, za wiela Krepli niy broły do dom i sam w doma niy wdupioły, zamiast konsumować, bo kiero Kreple wdupio to potyn mo rzić tako srogo jak cołki Berlin po zjydnoczyniu Niymiec, powyżyj tyj rzici óna mo Berliner Ring, a jejich chop do niyj niy godo "Berta", ino "Krepel".
Chopy tyż sie muszom dować pozór, bo baby som zeżyrne, a pragliwe, co żech sam tukej już opisywała:
https://www.salon24.pl/u/kobietakula/1233071,krotko-notka-o-zezyrnych-a-pragliwych-schacharzonych-babach
ale tako raszpla we karnawał sie niy tak gibko chopa wyłonaczy, bo we karnawał to je kożdy poprzeblykany i to je do nij za srogie ryzyko, że sie jeji jaki "goły jak Noły" trefi i potyn ino poruta bydzie.
We karnawał muszom chopy doć sie pozór na inksze gacopiyrze za Angelusy poprzeblykane, bo po prowdzie to niy som żodne gryfne frele ino strzigi, połednice, abo wampiyrze i łod takiygo chopa niy chcom geldu ino dusziczka.
Ale to co je nojgorsze ze wszyjstkigo to je Bebok. Na Beboki sie muszom dować pozór niy ino bajtle, ale baby i chopy, a niy ino we karnawał, ale bez cołki rok.
Bebok niy je srogi, mo ino kole pół metra, ale bez to może kożdymu na pukel skoczyć, a ze pukla we gowa i tam durś siedzieć. A kto mo Beboka we gowie, to mo zarozki coś z deklym, bo bez ónego Beboka tyn dekiel sie richtik niy zawiero i taki istny, abo istno, zaczyno dupcyć fleki, a fandzolić jak gupielok.
Wiela Beboków terozki skoko i furgo a ze zgorszenio i wadzenio sie ludziów majom wiela szpasu , co jo widza na tyn przykłod na Salon24.
Bez to, ludkowie, dejcie sie na Beboki pozór!
I tela.
