Ja, ludkowie rostojmili, łod zowdy jo miała taki blik jak gacopiyrz i po ćmoku żech wszyjstko do imyntu tyż mogła uwidzieć, bez to jo tyż niy je jako ajnfachowo baba ino upiorno frela, a wompiyrz kulisty, a zaś żech sam znodła co do szpasu we tym internecie.
Momy sam na Salonie tako motyka, co durś to samo fandzoli, a ino chopy jejich pod deklym rumplujom, bo sie jeji zdowo, że óna je jako rechtórka i wszyjstko zno o łonaczyniu chopa, ale óna niy mo recht, bo recht mom jo, a po czymu to wom sam zarozki wykludza.
Nojsompiyrw zaś wom napisza co sie filozofuje ta samozwańczo rechtórka o babach, bo to je richtik poruta tak dupcyć fleki, ale ino we skrócyniu, a bo jak bych sam chcioła cołki cytat wciepać to by móg sie tyn i ów do galot zdżistać, abo zy śmiychu, abo zy zgorszynio.
Pyto sie óna czy baby lubiom cyganić i zarozki łodpowiado, że baby przajom cygaństwom, bo to je naturalne we naturze babskij i tako cygańsko natura we kożdyj babie dominuje, a jak ona godo, że niy cygani to tyż to je cygaństwo.
Łod bajtla som te baby ino durś cyganione bez cołki czos, bez łojców, a potyn bez kożdygo inkszygo i kiejby te baby same niy cyganiły to by niy mioły ajnfach i żodnygo chopa by niy wyłonaczyły, bez co sie te baby robiom make upy, do buzynhaltra sie cisnom badeszwam czy inkszy wichajster, a potyn sie im pod deklym wszyjstko pofandzoli i sie im wydowo, że som jakom gryfnom frelom co chopa wyłonaczy i nim bydzie regiyrować.
Dalij żech już niy czytała, bo jo niy gustuja we autobiografijach babów co przajom cygaństwom, kudły majom ze plastiku i wciepujom na awatar pocyganione zdjyncia, ale żech postanowiła o cygaństwie we społeczyństwie napisać.
Zowdy mie za bajtla godali, że jak byda cyganić to przidzie Bebok i mie do lnionego saku wciepie, a tak przyfandzoli krykom bez rzić, że sie do galot zdżistom. Wszyjstkie wiedzom, że zdżistane galoty to je gańba i bez to żech sie ino trzimała takij sekwencyji, że lepij godać prowda, bo prowda nos wyzwolo, co na tyn przykłod działo wzglyndym łonaczynio chopa, bo jeszcze sie żodyn nie znaloz taki, co jak żech mu pedziała, że je rzadny z gymby, a mu capiom fuzekle, to łon mie łod siebie nie wyzwolił.
Zowdy godom prowda, a z nikim sie niy wadza, bo wadzynie niy je dobre dlo urody, ale jak tam pora razów żech prowda pedziała to tyn istny, abo ta istno sie ale chcieli richtik wadzić.
Ja, tak to zowdy bywało, że tyn co prawda godoł to jedne godali, że mo ón niewyparzóny pysk, a sie na niym łoszydzili, a sie na niygo kómu lutowali, ale inksze godali, że sie idzie na niygo spuścić i mieli onego w zocy.
Bez to, ludkowie, wam prowda prawia, że wczorej żech mioła Geburstag i mom lot 50, ale jak uwidzieć idzie, sie nie starzeja ino młodnieja, na kożdygo chopa ino lukna i go potyn gibko wyłonaczom, a potyn sie ida na halba i dziwuja sie co na tym świecie tela cygaństwa, a wyłonaczonych ludziów...